بیجنگ: چین میں ایک خاتون ڈیپارٹمنٹل اسٹور کی ایکسیلیٹر کا پلیٹ فارم ٹوٹ جانے کے سبب الیکٹرانک سیڑھیوں میں پھنس کر ہلاک ہوگئی۔
تفصیلات کے مطابق 30 سالہ زیانگ لوئی جیان اپنے بیٹے کو گود میں تھامے ڈیپارٹمنٹل اسٹور کے ایکسیلیٹر کے ذریعے اوپر آرہی تھی کہ برقی زینے کا پلیٹ فارم ٹوٹ گیا۔
سیکیورٹی ویڈیو کیمرہ کی آن لائن گردش کرتی ویڈیو میں دیکھا جاسکتا ہے کہ کس طرح خاتون جب برقی زینے سے اوپر آئی تو زینہ ٹوٹ گیا اور خاتون نے گرتے گرتے اپنے کم سن بیٹے کو آگے کی جانب دھکا دے دیا جسے نزدیک ہی موجود دکاندار نے کھینچ کر بچالیا۔
ڈیپارٹمنٹل اسٹور کے عملے کے ایک فرد نے خاتون کا ہاتھ پکڑ کراسے کھنیچنے کی کوشش کی لیکن برقی زینہ مسلسل گھومتا رہا اورچند ہی لمحوں میں زیانگ اس سسٹم میں نیچے کی جانب چلی گئی۔
فائر فائٹرز نے چار گھنٹے کی جدو جہد کے بعد جب مشین کو کاٹ کر خاتون کو باہر نکالا تو وہ انتقال کرچکی تھیں۔
