کراچی: شہر قائد میں موسلادھار بارش نے موسم خوشگوار کردیا تو وہیں کے الیکٹرک کا نظام بھی جواب دے گیا، جس کے ایک سو ساٹھ سے زائد فیڈر ٹرپ کرگئے۔
اہلیان کراچی کا انتظار ختم ہوا، کراچی کے مختلف علاقوں میں باران رحمت جم کر برسی جس سے گرمی کا زور ٹوٹ گیا اور موسم خوشگوار ہوگیا۔
شہر میں بارش شروع ہوتے ہی منچلے بارش کوانجوائے کرنے گھروں سے نکل آئے،بارش نے شہر کے موسم سہانا بنادیا۔
باران رحمت کے برستے ہی کےالیکٹرک کا نظام بھی جواب دے گیا اور ایک سو ساٹھ سے زائد فیڈر ٹرپ کرگئے جس کے باعث روشنیوں کا شہر اندھیروں کی آماجگاہ بن گیا۔
کراچی میں تیز ہوا کے ساتھ بارش نے بلدیاتی اداروں کے دعوؤں کی بھی قلعی کھول دی، اہم شاہراہوں پر پانی جمع ہوگیا اور کمشنر کراچی کے رین ایمرجنسی کے دعوے بھی دھرے کے دھرے رہ گئے۔
شہر کے تمام انڈر پاسز پانی سے بھر گئے اور رین ایمرجنسی کا عملہ بھی غائب ہے۔
