تمام تر پابندیوں اور رکاوٹوں کے باجود کراچی میں سال نو کے آغاز پر قانون کی دھجیاں بکھیر دی گئیں، شدید فائرنگ سے سات افراد زخمی جبکہ قانون کی خلاف ورزی کرنے پر آٹھ افراد کو دھر لیا گیا۔
ذرائع کے مطابق سال نو کے آغاز پرحکومت کے دعوے دھرے کے دھرے رہ گئے، شہر کے مختلف مقامات پر منچلے نوجوان ڈبل سواری کیخلاف ورزی کرتے ہوئے نظر آئے جبکہ بارہ بجنے سے پہلے شہر کے تقریباً تمام ہی علاقوں میں شدید فائرنگ کا سلسلہ شروع ہوا، جو رات دیر تک جاری رہا۔
اس موقع پر ہر قسم کے جدید اور ممنوعہ اسلحے استعمال کئے گئے، شہر کے مختلف علاقوں کھارادر، میٹھادر، بہارکالونی ، اختر کالونی اور ڈیفنس میں فائرنگ کی زد میں آکر سات افراد زخمی ہوگئے جبکہ دوسری جانب پولیس نے مختلف علاقوں شاہراہ نورجہاں، ڈیفنس اور اخترکالونی سے قانون کی خلاف ورزی کرنے پر آٹھ افراد کو حراست میں لے لیا۔
