کینجھر جھیل میں نوری جام تماچی کے مزار سے ملنے والی پانچ افراد کی لاشوں کا معمہ تاحال حل نہ ہوسکا، میڈیکل رپورٹ کے مطابق پانچوں افراد کو قریب سے گولیاں مار کرقتل کیا گیا۔
کینجھر جھیل کے ٹاپو پر نوری جام تماچی کے مزار سے ملنے والی پانچ لاشوں کا معمہ حل نہ ہوسکا، ہلاک افراد کی میڈیکل رپورٹ آجانے کے بعد بھی واقعہ بدستور پر اسرار ہے۔
رپورٹ کے مطابق پانچ افراد کو انتہائی قریب سے گولیاں مار کرقتل کیا گیا، اور مقتولین کو زہر نہیں دیا گیا لیکن رپورٹ میں یہ نہیں بتایا گیا کہ پانچوں افراد نے کوئی مزاحمت کیوں نہیں کی ؟کیا انہیں کوئی نشہ آور ادویات دی گئی تھیں یا نہیں؟ یہ بھی ممکن ہے کہ پانچوں افراد نے خود ہی موت کو گلے لگالیا ہو؟
وقوعے کے فوری بعد ایس ایس پی ٹھٹھہ حسیب افضل بیگ نے اسے بلائنڈ مرڈر قرار دیا تھا، نوری جام تماچی کے مزار سے ملنے والے پستول کو فرانزک لیبارٹری روانہ کیا گیا تھا، جس کی رپورٹ کے مطابق پانچوں کو اسی پستول سے فائرنگ کر کے ہلاک کیا گیا۔
ذرائع کے مطابق ملنے والا پستول ہلاک ہونے والے ریٹائرڈ میجر جہانگیر کا تھا۔
