پنجاب: گوجر خان کے قریب فائرنگ سے ماڈل ایان علی کے والد محمد حفیظ زخمی ہوگئے۔
ذرائع کے مطابق ماڈل ایان علی کے والد محمد حفیظ پر موٹر سائیکل سوار دو نامعلوم حملہ آوروں نے فائرنگ کی، جس وہ زخمی ہوگئے، محمد حفیظ کو تحصیل اسپتال گوجر خان منتقل کردیا گیا، جہاں ان کی حالت خطرے سے باہر ہے۔
اسپتال زرائع کے مطابق محمد حفیظ کو بازو میں گولی لگی ہے ۔
پولیس ذرائع کا کہنا ہے سپرماڈل کے والد کو کئی روز سے دھمکیاں مل رہی تھیں۔
محمد حفیظ کا کہنا ہے کہ مجھ پر حملے میں وہی ملوث ہیں جو ایان کیس کے پیچھے ہیں، زخمی محمد حفیظ کا کہنا تھا کہ ایان پر دباؤ ڈالا جارہا ہے پکڑے جانے والا پیسہ اُن کی بیٹی کا نہیں تھا ۔
ایان کے والد کا کہنا تھا کہ جب سے ایان کو گرفتار کیا گیا ہے مجھے بھی نامعلوم افراد کی جانب سے دھمکیاں دی جا رہی ہیں، واقعے کا مقدمہ دو نامعلوم موٹرسائکل سواروں کیخلاف گوجر خان میں درج کرلیا گیا ہے۔
اس سے قبل کسٹم کی خصوصی عدالت نے سپر ماڈل ایان علی کو مزید چودہ روز کے جوڈیشل ریمانڈ پر اڈیالہ جیل بھیج دیا ہے جبکہ سپر ماڈل کی بی کلاس جیل کی درخواست بھی خارج کردی گئی ہے۔
