اسلام آباد: پارلیمنٹ کی طرف سے اثاثوں کی گوشوارے جمع کرانے کی آج آخری تاریخ ہے، ایک ہزار ایک سو ستر اراکین میں سے صرف تین سو پانچ اراکین نے اثاثے جمع کرائے ہیں۔
منتخب ارکان اسمبلی کی جانب سے اپنے اثاثوں کے گوشوارے جمع کرانے کا سلسلہ جاری ہے، اثاثوں کے گوشوارے جمع کرانے کا آج آخری دن ہے، الیکشن کمیشن کا کہنا ہے کہ اب تک تین سو پانچ ارکان نے اپنے گوشوارے جمع کروا دیئےہیں، گوشوارے جمع کرانے والوں میں فاروق ایچ نائیک، اعتزازاحسن، سکندر بوسن، شاہی سید شامل ہیں۔
وزیرِاعلی خیبر پختونخوا پرویز خٹک، پیپلزپارٹی رہنماء مخدوم امین فہیم، تحریکِ انصاف کے چیئرمین عمرا ن خان، وزیرِاعلی پنجاب شہبازشریف سمیت متعدد اہم اراکین کے گوشوارے ابھی تک جمع نہیں ہوئے ہیں ۔
گوشوارے جمع نہ کرانے والے اراکین کے نام پندرہ اکتوبر کو جاری کیے جائیں گے، پندرہ اکتوبرکے بعد اثاثوں کی تفصیلات جمع نہ کرانے والے اراکین کو کام سے روکا جا سکتا ہے۔
قومی اسمبلی کے ایک سوچالیس، سینٹ کے پچپن، پنجاب اسمبلی کے تریسٹھ، سندھ اسمبلی کے ترپن، خیبرپختونخوا کے چونتیس جبکہ بلوچستان اسمبلی کے پندرہ اراکین نے اثاثوں کی تفصیلات جمع کروائیں ہیں۔
