ڈی آئی خان : خیبرپختونخوا کے وزیرمالیات امین علی گنڈاپورکا پولیس نے ایک روزہ ریمانڈ حاصل کرلیا۔
تفصیلات کے مطابق کے پی کے کے وزیر مالیات امین علی گنڈاپور کو پولیس نے ہتھکڑیاں لگا کر عدالت میں پیش کیا، جہاں بیلٹ باکس چوری کےالزام کی تفتیش کےلئےپولیس کوایک روزہ ریمانڈمل گیا۔
علی امین گنڈاپور کو بلدیاتی انتخابات میں بیلٹ بکس چھیننے اورپریزائیڈنگ افسر سمیت ایس ایچ او کوتشدد کا نشانہ بنانے پرگزشتہ روز گرفتارکیاگیا تھا۔
علی امین گنڈاپور ہتھکڑیاں پہنے ڈیرہ اسماعیل خان میں حامیوں کے ہمراہ جوڈیشل مجسٹریٹ کی عدالت میں پیش ہوئے۔ اس موقع پر سیکیورٹی کے انتہائی سخت انتظامات کئے گئے تھے۔
عدالت نے مقدمہ دوسو پچیس اوردوسوچھبیس کی سماعت کے دوران صوبائی وزیر کو ایک روزہ جوڈیشنل ریمانڈ پر جیل بھیج دیا۔
وکٹری کا نشان بناتے ہوئےعلی امین گنڈاپور عدالت سے باہر آئے اور کہا کہ دھاندلی کے خلاف وہ ہرقسم کی سزا بھگتنے کے لئے تیار ہیں۔
واضح رہے کہ پی ٹی آئی کے صوبائی وزیر کے خلاف بلدیاتی انتخابات کے دوران بیلٹ باکس چھیننے، سرکاری کام میں مداخلت اور پولیس افسران سے بدتمیزی کرنے کے الزامات کے تحت 3 مقدمات درج ہیں۔
گزشتہ روز صوبائی وزیر علی امین گنڈا پور کو گرفتار کرنے کے لیے ڈی پی او ڈیرہ اسماعیل خان صادق بلوچ نے پولیس کی بھاری نفری کے ہمراہ ان کی رہائشگاہ کو پانچ گھنٹے تک گھیرے رکھا۔
پولیس کی جانب سے صوبائی وزیر کے گھر کے گھیراؤ پرتحریک انصاف کے کارکنوں نے شدید احتجاج بھی کیا۔
