آج پاکستان سمیت دنیا بھرمیں آزادی صحافت کا عالمی دن ’’ورلڈ پریس فریڈم ڈے‘‘بھرپور انداز میں منایا جارہا ہے۔
یہ دن ہر سال 3 مئی کو منایا جاتا ہے اورآزادی صحافت کا عالمی دن منانے کا مقصد پیشہ وارانہ فرائض کی بجا آوری کیلئے میڈیا کو درپیش مشکلات، مسائل ، دھمکی آمیز رویہ اور صحافیوں کی زندگیوں کو درپیش خطرات کے متعلق قوم اوردنیا کو آگاہ کرانا ہے۔
اس دن کے انعقاد کی ایک وجہ سوسائٹی کو یہ یاد دلانا بھی ہے کہ عوام کو حقائق پر مبنی خبریں فراہم کرنے کیلئے کتنے ہی صحافی اس دنیا سے چلے گئے اور کئی پس دیوار زنداں ہیں۔
ورلڈ پریس فریڈم ڈے کا آغاز 1993ء میں ہوا تھا اس دن کی باقاعدہ منظوری اقوام متحدہ کے ادارے جنرل اسمبلی نے دی تھی۔
صحافت کی موجودہ آزادی کسی کی دی ہوئی نہیں بلکہ یہ صحافیوں کی جدوجہد کا نتیجہ ہے جنہوں نے عقوبت خانوں میں تشدد سہا،کوڑے کھائے اورپابند سلاسل رہے۔
پاکستان میں کتنے ہی صحافی حق اور سچ کوعوام تک پہنچانے کے اس پرخطر پیشے میں اپنی جان جانِ آفریں کے سپرد کرچکے ہیں۔
بقول فیض احمد فیض
متاع لوح و قلم چھن گئی تو کیا غم ہے
کہ خون دل میں ڈبولی ہیں انگلیاں میں نے
زبان پر مہر لگی ہے تو کیا،کہ رکھ دی ہے
ہر ایک حلقہ زنجیر میں زباں میں نے
