کراچی : آٹھویں دفاعی نمائش آئیڈیاز دوہزار چودہ کا آغاز ہوگیا ہے، کراچی ایکسپو سینٹر میں ہونے والی نمائش کا افتتاح وزیرِاعظم نواز شریف نے کیا۔
آٹھویں دفاعی نمائش آئیڈیاز دوہزارچودہ کا آغاز کراچی میں ہوگیا ہے، چار روزہ بین الاقوامی دفاعی نمائش میں جدید جنگی سامان نمائش کے لئے پیش کئے گئے ہیں، الخالد ٹینک ، جے ایف سترہ تھنڈرطیارہ، بکتر بند گاڑیاں اور میزائلوں سے لیس کشتیوں سمیت مقامی سطح پر تیار کی گئی دیگر دفاعی مصنوعات بھی نمائش کا حصہ ہیں۔
پاکستان ایرو ناٹیکل کمپلیکس کے ڈی جی ایئر کموڈور منصور حسین خان کا کہنا ہے کہ بغیر پائلٹ کے جاسوس طیار ے جلد تیا ر کرلیے جائیں گے، نمائش میں پاکستان سے اہم دفاعی معاہدہ کرنے والا ملک روس بھی اپنی مصنوعات کے ساتھ پہلی بار شرکت کررہا ہے جب کہ غیر ملکی مندوبین اور اہم سرکاری حکام کے درمیان کئی اعلیٰ سطح کی ملاقاتیں بھی ہوں گی۔
دفاعی نمائش کے موقع پرسیکورٹی کے سخت اقدامات کئے گئے ہیں۔
