ریاض: سعودی فرمانروا شاہ سلمان بن عبدالعزیز السعود نے امریکی صدر باراک اوبامہ سے کہا ہے کہ انہیں امید ہے کہ ایران اور عالمی طاقتوں کے درمیان حتمی نیوکلیئر سمجھوتے سے خطے اور عالمی امن کو استحکام ملے گا۔
سعودی عرب کی سرکاری خبر رساں ایجنسی کے مطابق امریکی صدر اور سعودی فرمانروا کے درمیان ٹیلی فونک رابطہ ہوا جس میں ایران اور مغرب کے درمیان ہونے والے معاہدے پر گفتگو کی گئی۔
ایران اور عالمی طاقتوں کے درمیان سوئٹزرلینڈ میں ہونے والے طویل مذاکرات کے نتیجے میں بالاخر ایک حتمی معاہدہ تشکیل پا گیا ہے جس کے تحت ایران نیوکلئیر ہتھیارنہیں بنائے گا۔ گزشتہ 12 سال میں میں ایران اور مغرب کے درمیان پہلی بار یہ ایک بڑی پیش رفت ہے۔
ایران اور سعودی عرب مشرقِ وسطیٰ میں ایک دوسرے کے سب سے بڑے حریف ہیں اور ان دونوں کے درمیان تعلقات شام کے مسئلے پر کافی کشیدہ ہیں جنہیں حالیہ یمنی بحران سے ہوا ملی ہے۔
سعودی عرب کے سابق انٹیلی جنس چیف ترکی الفیصل نے حکومت کو خبردار کیا تھا کہ جس قسم کا معاہدہ ایران کے ساتھ ہو ویسا ہی سعودی عرب کے ساتھ بھی ہونا چاہیے تاکہ خطے میں طاقت کا توازن برقرار رہے۔۔
ایک مغربی ملک کے سفیر کا کہنا ہے کہ سعودیہ سب سے پہلے تو امریکہ سمیت ایران سےمذاکرات کرنے والی طاقتوں سے یقین دہانی چاہے گا اور اگر اس سے بھی بات نہیں بنی تو سعودی عرب پاکستان سے نیوکلیائی ہتھیاروں کے سلسلے میں مدد لے سکتا ہے۔
