لاہور: ہائیکورٹ نے این اے ایک سو بائیس پر ٹریبونل فیصلے کے خلاف قومی اسپیکر اسمبلی ایاز صادق کی درخواست مسترد کردی، تھیلے کھول کر ووٹوں کی جانچ پڑتال آج سے شروع ہوگی۔
کیس کی سماعت لاہور ہائیکورٹ کے جج جسٹس اعجاز الحسن نے کی سردار ایازصادق کے وکیل نے دلائل دیئے کہ عمران خان کی الیکشن ٹریبونل میں دائر درخواست جعلی اوتھ کمشنر سے تصدیق شدہ تھی، جسکے خلاف مقدمہ بھی درج ہوچکا ہے۔
وکیل کا کہنا تھا کہ الیکشن ٹریبونل سے اس حوالے سے ان کے اعتراضات نہیں سنے، عمران خان کی شہادتیں مکمل ہونے کے بعد ٹریبونل نے فیصلہ سنا دیا جبکہ سپریم کورٹ کے واضح احکامات موجود ہیں، اعتراضات کا فیصلہ کیے بغیر کیس کی سماعت نہیں کی جاسکتی۔
عدالت نے سردار ایاز صادق کی جانب سے الیکشن ٹریبونل کے این اے ایک سو بائیس سے متعلق فیصلے اور ٹریبونل کے جج کاظم ملک کے خلاف توہین عدالت کی درخواستیں ناقابل سماعت قرار دیتے ہوئے مسترد کردیں۔
ایاز صادق کے وکیل نے میڈیا سے گفتگو میں کہا کہ ہائیکورٹ کے فیصلے کو سپریم کورٹ میں چیلنج کرینگے، ایاز صادق کی اپیل مسترد ہونے کے بعد این اے ایک سوبائیس پر ووٹوں کی جانچ پڑتال آج سے شروع ہوگی۔
