ایڈلیڈ : آسٹریلیا نے بھارت کو اڑتالیس رنز سے شکست دے کر چار میچز کی ٹیسٹ سیریز میں ایک صفر کی برتری حاصل کرلی۔
ایڈلیڈ میں کھیلے گئے میچ کے آخری روز آسٹریلیا نے دوسری اننگز دو سو نوے رنز پانچ کھلاڑی آوٹ پر ڈیکلئیر کرکے بھارت کو کامیابی کے لئے تین سو چونسٹھ رنز کا ہدف دیا۔ بھارت کے ابتدائی دو کھلاڑی صرف ستاون رنز پر آوٹ ہوگئے۔
جس کے بعد مرلی وجے نے کپتان ویرات کوہلی کے ساتھ مل کر اسکور میں ایک سو پچاسی رنز کا اضافہ کیا۔ مرلی وجہ ناروس نائنٹیز کا شکار بنے اور ننانوے رنز بنا کر آوٹ ہوگئے۔ ویرات کوہلی نے آسٹریلوی بولرز کے سامنے مزاحمت جاری رکھی تاہم وہ ایک سو اکتالیس رنز بنا کر کیچ آوٹ ہوگئے۔ ہدف کے تعاقب میں بھارت کی پوری ٹیم تین سو پندرہ رنز پر پویلین لوٹ گئی۔ نیتھن لیون نے دوسری اننگز میں سات وکٹوں سمیت میچ میں بارہ کھلاڑیوں کو آوٹ کیا۔
