گڑھی خدابخش : دہشت گردوں کے حملے میں شہید ہونے والی بے نظیر بھٹو کی برسی آج منائی جارہی ہے، پیپلزپارٹی کے رہنماؤں اور کارکنوں کی بڑی تعداد گڑھی خدابخش پہنچ چکی ہے۔
شہید محترمہ بینظیربھٹو کی ساتویں برسی آج منائی جارہی ہے، اپنی قائد کو خراجِ عقیدت پیش کرنے کیلئے جیالوں کی بڑی تعداد گڑھی خدابخش پہنچ چکی ہے، سابق صدر آصف علی زرداری اور بختاور بھٹو زررداری نے بینظیر بھٹو کے مزار پرحاضری دی اوران کی قبر پر پھول نچھاور کیے۔
پیپلزپارٹی کے دیگر رہنماء بھی برسی کی تقریب میں شرکت کیلئے پہنچ چکے ہیں، پنجاب سے پیپلزپارٹی کے رہنماؤں کا قافلہ پہنچ گیا ہے، برسی کی تقریب کیلئے سیکیورٹی کے خصوصی انتظامات کیے گئے، کارکنوں کو سخت چیکنگ کے بعد مزار کی طرف جانے کی اجازت دی جارہی ہے۔
برسی کی تقریبات کے دوران چھ ہزار سے زائد پولیس اور رینجرز اہل کار تعینات کیے گئے ہیں ۔ جلسہ گاہ اور اطراف کے علاقوں میں ایک سو سے زائد سی سی ٹی وی کیمرے بھی نصب کیے گئے ہیں۔
شہید محترمہ بینظیر بھٹو ستائیس دسمبر دوہزار سات کو راولپنڈی میں جلسے کے بعد دہشت گردوں کے حملے میں شہید ہوگئی تھیں۔
