راولپنڈی: احتساب عدالت نے سابق وزیرداخلہ رحمان ملک کو کرپشن کے دو ریفرنسز میں بری کردیا۔
راولپنڈی میں احتساب کی خصوصی عدالت نے سابق وزیرداخلہ رحمان ملک کو کرپشن کے دو ریفرنسز میں بری کرنے کا فیصلہ سنادیا، جج سہیل ناصر نے دو علیحدہ علیحدہ ریفرنسز میں سنائی جانے والی سزاوں کالعدم قرار دیا۔
عدالت میں رحمان ملک نے مؤقف اختیار کیا کہ دونوں ریفرنسز میں سنائی جانے والی سزاؤں میں قانون تقاضے پورے نہیں ہوئے۔ سزائیں کالعدم قرار دی جائے جس پر عدالت نے ان کے حق میں فیصلہ سنایا ۔
عدالت کے باہر میڈیا سے گفتگو کرتے ہوئے رحمان ملک نے انکشاف کیا کہ ریفرنسز کے ذریعے بینظیرقتل کیس میں وعدہ معاف گواہ بنانےکیلئےدباؤڈالا تھا لیکن مخالفین ناکام ہوئے۔
واضح رہے کہ سپریم کورٹ نے رحمان ملک کو نیب عدالت کی جانب سے سنائی گئی سزا معطل کر دی تھی۔
عدم پیشی پر نیب عدالت کی جانب سے دی گئی سزا کیخلاف رحمان ملک کی درخواست کی سماعت سپریم کورٹ میں ہوئی، سماعت جسٹس ثاقب نثار کی سربراہی میں تین رکنی بنچ نے کی، رحمان ملک کے وکیل نے مؤقف اپنایا کہ عدالت کی جانب سے عدم حاضری میں سزا سنانے پر انصاف کے تقاضے پورے نہیں ہوتے۔
رحمان ملک کے وکیل نے استدعا کی کہ نیب کورٹ کی جانب سے دی جانے والی سزا کو کالعدم قرار دیا جائے۔ جس پر سپریم کورٹ نے سزا معطل کرنے کا حکم دیا۔
اس سے قبل رحمان ملک نے مؤقف اختیار کیا تھا کہ سپریم کورٹ نواز شریف کی غیر حاضری میں دی گئی سزا کالعدم قرار دے چکی ہے جبکہ نیب عدالت نے میری غیرحاضری میں مجھے سزا سنائی، مجھ پر قاتلانہ حملہ ہوا جس کے بعد میں بیرون ملک چلا گیا تھا۔
یاد رہے کہ نیب نے1996 میں رحمان ملک کے خلاف ریفرنس دائر کیا تھا۔
