کراچی :پولیس اور رینجرز نے کراچی میں جرائم پیشہ عناصر کیخلاف گھیرا تنگ کردیا، رینجرز نے مختلف کارروائیوں میں آٹھ اور پولیس نے ایک ڈکیت کو مارگرایا۔
مختلف علاقوں میں فائرنگ اور پرتشدد واقعات میں دو افراد جاں بحق ہوگئے ۔ ترجمان رینجرز کے مطابق پاک کالونی کے علاقے میں رینجرز کے مقابلے کے دوران بی ایل اے کا ایک کارندہ مارا گیا، جو لیاری گینگ وار کیلئے بھی کام کرتا تھا۔
مارا گیا ملزم جرائم کی متعدد وارداتوں میں ملوث تھا۔ اورنگی ٹاؤن کے علاقے پریشان چوک کے قریب فقیر کالونی میں رینجرز نے رات کو ایک مکان میں دہشت گردوں کی موجودگی کی اطلاع پر چھاپہ مارا۔
اس دوران مکان میں موجود دہشت گردوں نے دستی بم سے حملہ کیا اور فائرنگ کی اس دوران ایک دہشت گرد نے خود کش دھماکہ کردیا جس سے مکان میں موجود تمام دہشت گرد ہلاک ہوگئے اور مکان زمین بوس ہوگئے۔
مکان کے ملبے سے ایک زخمی کو نکال لیا گیا، بریگیڈیئرخرم کے مطابق ہلاک دہشت گردوں کا تعلق تحریک طالبان سے تھا اور وہ ملیر کینٹ پر حملے کا منصوبہ بنا رہے تھے۔
رینجرز نے صبح مومن آباد میں ایک مکان پر دہشت گردوں کی موجودگی کی اطلاع پر چھاپہ مارا جہاں پربھی دہشت گردوں نے مقابلہ شروع کردیا اور اس دوران چار دہشت گرد مارے گئے، جبکہ ایک دہشت گرد نے خود کو دھماکا کرکے اڑا لیا۔
اس آپریشن میں ایک مغوی بچے کو بازیاب کروایا گیا، جس کی رہائی کیلئے دہشت گردوں نے تاوان مانگا تھا۔بوٹ بیسن کے علاقے میں پولیس مقابلے میں ایک ڈکیت مارا گیا۔
دوسری جا نب نیو کراچی میں نامعلوم افراد کی فائرنگ سے ایک شخص جان کی بازی ہار گیا۔ عیسیٰ نگری کے قریب سے ایک شخص کی لاش ملی ، لانڈھی میں فائرنگ سے دو بھائی زخمی ہوگئے۔
