لاہور: سانحہ ماڈل ٹاون کی عدالتی تحقیقات کے لیے قائم ٹریبونل کے روبرو ڈی آئی جی رانا عبدالجبار، ایس پی ماڈل ٹاون اور ایس پی سی آئی اے سمیت دس پولیس افسران کے بیانات پر جرح مکمل کرلی گئی۔
جسٹس علی باقر نجفی کی سربراہی میں ٹریبونل نے کارروائی کا آغاز کیا تو ڈی آئی جی رانا عبدالجبار، ایس پی ماڈل ٹاون طارق عزیز اور ایس پی سی آئی اے عمر ورک سمیت دس پولیس افسران کے بیانات پر فاضل ٹریبونل نے بند کمرے میں جر ح کی۔
اس موقع پر ٹریبونل کے معاونین نے بند کمرے میں سماعت پر تحفظات کا اظہار کرتے ہوئے ٹریبونل کے رجسٹرار کے پاس اپنا احتجاج ریکارڈ کروایا ۔ معاونین کا کہنا تھا کہ سانحہ ماڈل ٹاون کے حوالے سے تمام تر حقائق سے قوم کو آگاہ ہونا چاہیے اس لیے بند کمرے میں کارروائی قابل قبول نہیں۔
پولیس افسران کی جانب سے بیانا ت پر جرح کے بعد ٹریبونل نے کارروائی پچیس جولائی تک ملتوی کرتے ہوئے آئی جی پنجاب کے تبادلے کے حوالے سے سیکرٹری اسٹیبلشمنٹ سے رپورٹ طلب کر لی ۔
