کراچی : ملک بھر میں جشن آزادی جوش و خروش سے منایا جارہا ہے، سندھ بھر میں جشن آزادی کی تقریبات کا سلسلہ جاری ہے، گورنر سندھ اور وزیر اعلی قائم علی شاہ نے مزار قائد پر حاضری دی۔
جشن آزادی کے سلسلے میں سندھ بھر میں تقریبات کا سلسلہ جاری ہے۔ گورنر سندھ ڈاکٹر عشرت العباد اور وزیر اعلیٰ سید قائم علی شاہ کے ہمراہ سند ھ اسمبلی کے اراکین نے مزار قائد پر حاضری دی اور فاتحہ خوانی کی، اس موقع پر گورنر سندھ عشرت العباد نے قوم کو جشن آزادی کی مبارکباد پیش کی۔
وزیر اعلی سندھ قائم علی شاہ نے بانی پاکستان قائداعظم کی جدوجہد کو خراج تحسین پیش کیا، قائد اعظم کے مزار پر اراکین سندھ اسمبلی نے قوم کو جشن آزای کی مبارکباد پیش کرتے ہوئے اتحاد برقرار رکھنے کا پیغام دیا۔
یوم آزادی پر کسی بھی نا خوشگوار واقعے سے نمٹنے کیلئے شہر بھر میں سیکیورٹی کے سخت انتظامات کیے گئے ہیں۔
