پاکستان تحریک انصاف کے سربراہ عمران خان نے کہا ہے کہ نئے سال کے آغاز پریٹرولیم مصنوعات کی قیمتوں میں مجوزہ اضافہ مسترد کرتے ہیں کیونکہ اس سے عوام مہنگائی کی چکی میں پس جائیں گے۔
لاہور میں پاکستان تحریک انصاف کے رہنما اعجاز چوہدری کے بیٹے کی دعوت ولیمہ کے موقع پر میڈیا سے گفتگوکرتے ہوئے عمران خان نے کہا کہ پیٹرول اور ڈیزل مہنگا کر کے حکومت چلانی ہے تو پھر وزیر خزانہ کی کوئی ضرورت نہیں ہے۔
پیٹرول اور ڈیزل کی قیمتیں بڑھنے سے ہر چیز مہنگی ہو گی اور تحریک انصاف مہنگائی کے خلاف بھرپور احتجاج کرے گی، عمران خان کا کہنا تھا کہ جب تک ٹیکس چوری اور کرپشن ختم نہیں ہو گی مہنگائی بڑھتی رہے گی اور ہم احتجاج کرتے رہیں گے۔
