کراچی: قومی ائیر لائن نے حج آپریشن کا آغاز کر دیا ہے، کراچی، لاہور، پشاور سے نو سو سے زائد عازمین حج حجاج مقدس روانہ ہوگئے۔
قومی ایئرلائن سمیت نجی ایئرلائنز نے حج آپریشن شروع کردیا، پی آئی اے کی پہلی پرواز پی کے2001کراچی سے تین سو سے زائد عازمین کو لیکر سعودی عرب کیلئے روانہ ہوئی، کراچی ایئرپورٹ پر ایم ڈی پی آئی اے شاہنواز رحمان ڈائریکٹر ایئرپورٹ سروسز اعجاز مظہر نے عازمین کو رخصت کیا۔
دوسری حج پرواز پی کے2101 لاہور سے تقر یبا تین سو سے زائد عازمین حج کو لیکر روانہ ہوئی، عازمین حج کو چیئرمین محمد علی گردیزی نے رخصت کیا جبکہ نجی ایئرلائن شاہین ایئر بھی حجاج کرام کو لیکرجدہ روانہ ہوئی۔
ترجمان پی آئی اے کے مطابق حج آپریشن کے دوران پی آئی اے کا بوئنگ 777اور جمبو747طیارہ حج آپریشن میں حصہ لے رہے ہے جبکہ ایک طیارہ اسٹینڈ بائی رہے گا، ایک سو سولہ پروازوں کے ذریعے ترپن ہزار سے زائد عازمین حج کو حجاج مقدس پہنچایا جائے گا۔
ذرائع کا کہنا ہے کہ کراچی ایئرپورٹ پر حملے کے باعث حج آپریشن اولڈ ٹرمینل کے بجائے قائد اعظم انٹر نیشنل ایئرپورٹ سے شروع کیا گیا ہے۔ ایئرپورٹ پر عازمین کیلئے ایمی گریشن کیلئے الگ سے کاونٹر بھی قائم کئے گئے ہیں۔
ترجمان پی آئی اے کے مطابق اس سال پی آئی اے سات شہروں کراچی ،لاہور ،اسلام آباد، پشاور، کوئٹہ اور ملتان سے براہ راست سعودی عرب کے لئے پروازیں چلا رہا ہے۔
ترجمان کے مطابق حج آپریشن کیلئے چار طیارے مختص ہونے کے باعث طیاروں کی کمی کو پورا کرنے کیلئے دو ائیر بس طیارے مختصر لیز پر حاصل کئے گئے ہیں جو شیڈول پروازوں کے لئے استعمال کئے جائیں گے۔
