جکارتہ :ملائیشیا کی نجی ائیرلائن کے لاپتہ طیارے کی تلاش کا کام تیسرے روز بھی جاری ہے۔ طیارہ اتوار کو انڈونیشیا سے سنگاپور جاتے ہوئےلاپتہ ہوگیا تھا۔
انڈونیشیا سے سنگاپور جاتے انڈونیشیا کی نجی ایئرلائن کے لاپتہ طیارے کی تلاش تیسرے روزبھی جاری ہے، بحیرہ جاوا میں سرچ آپریشن میں انڈونیشیا، ملائیشیا،سنگاپور، آسٹریلیا اور امریکی ٹیمیں حصہ لے رہی ہیں۔
طیارے کی تلاش میں تیس بحری جہاز،سات ہیلی کاپٹر اور پندرہ طیارے شریک ہیں۔
انڈونیشیا کے حکام کا کہنا ہے کہ لاپتہ طیارے کے پائلٹ نے ائیرٹریفک کنٹرول سے آخری گفتگو میں جہاز کو مزید بلندی پرلے جانے کی اجازت مانگی تھی جو دے دی گئی تھی لیکن اس کے بعد پائلٹ کی طرف سے کوئی جواب نہیں آیا۔
ملائیشیا کی نجی فضائی کمپنی ایئر ایشیا کی پرواز اتوار کی صبح انڈونیشیا کے جزیرے جاوا سے سنگاپور جاتے ہوئے بحیرۂ جاوا کے اوپر لاپتہ ہوئی تھی، طیارے میں عملے کے ارکان سمیت ایک سو باسٹھ افراد سوار تھے اور طیارے کا پرواز کے پینتالیس منٹ بعد ایئر ٹریفک کنٹرول سے رابطہ منقطع ہوگیا تھا۔
