پنجاب کے مختلف شہر صبح کے اوقات میں دھند کی لپیٹ میں رہنے لگے، شدید دھند کے باعث ٹریفک حادثات میں چار افراد جان سے ہاتھ دھو بیٹھے۔
لاہور سمیت پنجاب کے مختلف شہروں میں شدید دھند کےڈیرے ہیں، شدید دھند کے باعث بند ہونے والے لاہور ائیر پورٹ کو سات گھنٹے بعد پروازوں کے لئے کھول دیا ہے، ائیرپورٹ کو رات گیارہ بجے بند کیا گیا تھا، جس کے بعد لاہور جانے والی پروازوں کا رخ دوسرے شہروں کی جانب موڑ دیا گیا تھا۔
ریسکیو حکام کے مطابق ساہیوال اور کمالیہ میں بھی ٹریفک حادثات میں تین بچوں سمیت چھ افرادزخمی ہوگئے ہیں، راجن پور کے علاقے کوٹلہ عیسن کے قریب آئل ٹینکر اور ٹریکٹر ٹرالی میں تصادم سے دو افراد جاں بحق اور ایک زخمی ہوگئے۔
زخمی ہونے والے دونوں افراد کو فوری طبی امداد کیلئے جناح ہسپتال منتقل کر ديا گيا جبکہ دوسری جانب لاہور کے رنگ روڈ پر واقع عبداللہ گل انٹر چينج پر گارکو سروس کا منی ٹرک دھند کے باعث ايک کھمبے سے ٹکرا گيا۔
جس کے نتيجہ ميں گاڑي کا ڈرائيور موقع پر ہی جاں بحق ہوگيا، پوليس کے مطابق دھند ہی کے باعث لاہور ميں چونگی امرسدھو کے علاقہ ميں ٹرالر سڑک سے اتر کر کھڑی گاڑيوں سے ٹکرا گيا۔
جس کے نتيجے ميں گاڑيوں کو نقصان پہنچا تاہم کوئی جانی نقصان نہيں ہوا جبکہ ٹرالر کا ڈرائيور ٹرک چھوڑکر موقع سے فرار ہوگيا، ادھر شدید دھند کے باعث موٹر وے پر سفر کرنے والے مسافروں کو شدید مشکلات کا سامنا ہے۔
ترجمان موٹروے نے مسافروں کو متبادل راستے اختیار کرنے کی ہدایت کی ہے، ٹریفک حکام کا کہنا ہے کہ ڈرائیورز دھند میں فوگ لائٹس آن رکھیں اور احتیاط سے ڈرائیونگ کریں ۔
