ایبٹ آباد: پاکستان تحریک انصاف کے وائس چئیر مین شاہ محمود قریشی کا کہنا ہے کہ حکومت کی ترجیحات اپنی ذات کیلئے ہیں پاکستان اور عوام کیلئے نہیں۔
ایبٹ آباد میں معذور افراد کے عالمی دن کے موقع پر ایک نجی اسکول کی تقریب سے خطاب میں شاہ محمودقریشی کا کہنا تھا کہ اس وقت پاکستان کو تبدیلی کی ضرورت ہے ، بیس کروڑ کے ملک میں چند ہزار لوگوں کی ضرورت ہے جن کے پاس وژن اور کردار ہو تو ملک ترقی کی راہ پر گامزن ہو گا، ان کا کہنا تھا کہ بدقسمتی سے معاشرے میں برائیوں کو زیادہ اور اچھائیوں کو کم جگہ دی جاتی۔
شاہ محمود قریشی نے کہا ہے کہ موجودہ حکومت جو منتخب ہو کر آئی ہے اس کی ترجیحات اپنی ذات کیلئے ہیں پاکستان اور عوام کیلئے نہیں، ملک میں اس وقت حقیقی تبدیلی کیلئے ایسے منتخب نمائندوں کی ضرورت ہے جن کا دامن اور نیت صاف ہو۔
ان کا کہنا تھا کہ ہماری بدنصیبی ہے کہ ہم معاشرے کی برائیوں کو زیادہ جبکہ اچھائیوں کو کم اچھالتے ہیں، تقریب کے موقع پر معذور بچوں نے ٹیبلوز پیش کرکے مہمانوں سے خوب داد وصول کی۔
