دبئی: پہلے ون ڈے میچ میں نیوزی لینڈ نے پاکستان کو جیت کیلئے 247 رنز کا ہدف دے دیا ہے۔
نیوزی لینڈ کے خلاف پہلے ون ڈے میں پاکستان نے ٹاس جیت کر فیلڈنگ کا فیصلہ کیا ہے۔دبئی انٹرنیشنل اسٹیڈیم میں نیوزی لینڈ کے خلاف مصباح الحق نے پہلے ون ڈے میں ٹاس جیت لیا اور رات میں پڑنے والی اوس سے فائدہ اٹھانے کے لیے نیوزی لینڈ کو بیٹنگ کرنے کی دعوت دی ہے۔ جنہوں نے مقررہ 50 اوورز میں 7 وکٹوں کے نقصان پر 246 رنز بنائے۔
نیوزی لینڈ کی ابتدائی وکٹ محض 22 رنز پر گری جس کے بعد دیگر بلے باز بھی خاطر خواہ کارکردگی کا مظاہرہ کرنے میں ناکام رہے اور 111 کے مجموعے پر نیوزی لینڈ کے 5 کھلاڑی پویلین لوٹ چکے تھے۔ روز ٹیلر ڈگمگاتی صورتحال کے دوران میدان میں آئے اورشاندار بلے بازی کرتے ہوئے 135 گیندوں پر 105 رنز بنا کر ٹیم کی پوزیشن کو مستحکم کرنے میں اہم کردار ادا کیا۔ پاکستان کی جانب سے محمد عرفان نے 3، وہاب ریاض نے 2 اور شاہد آفریدی نے ایک وکٹ حاصل کی۔
محمد حفیظ پر بولنگ کی پابندی عائد ہونے کی وجہ سے پاکستان کو کمبی نیشن تشکیل دینے میں مشکل کا سامنا رہا۔
