کینبرا : ویسٹ انڈیز کے جارحانہ مزاج بلے باز کرس گیل کا بلا چل گیا۔ کرس گیل کی شاندار ڈبل سینچری کی بدولت ویسٹ انڈیز نے زمبابوے کو تین سو تہتّر رنز کا ہدف دے دیا۔
کینبرا میں کرس گیل فارم میں آگئے۔ ویسٹ انڈیز نے ٹاس جیت کر پہلے بیٹنگ کا فیصلہ کیا۔ اوپنر ڈوائن اسمتھ کے آؤٹ ہونے کے بعد کرس گیل حریف بولرز پر قہر بن کر ٹوٹے۔
گیل نے سولہ چھکوں اور نو چوکوں کی مدد سے ورلڈ کپ کی پہلی ڈبل سینچری اسکور کی۔ گیل نے ورلڈ کپ میں سب سے بڑی انفرادی اننگز کا ریکارڈ بھی اپنے نام کرلیا۔
مارلون سیمیولز نے بھی گیل کا بھرپور ساتھ دیا اور تیزی سے سینچری بناڈالی۔ دونوں بیٹسمینوں نے دوسری وکٹ کی شراکت کا بھی نیا عالمی ریکارڈ بناڈالا۔
آئی سی سی ورلڈ کپ کے گروپ بی کے میچ میں ویسٹ انڈیز اور زمبابوے کا مقابلہ جاری ہے ۔ ویسٹ انڈیزنے مقررہ پچاس اوورز میں تین سو بہتّر رنز بنائے،اوراس کے دو کھلاڑی آؤٹ ہوئے.
ویسٹ انڈیز نے زمبابوے کے خلاف ٹاس جیت کر پہلے بیٹنگ کا فیصلہ کیا ، آسٹریلیا کے شہر کینبرا کے منوکا اوول گراؤنڈ میں کھیلے جا رہے میچ میں ویسٹ انڈیز کی جانب سے اوپنر اسمتھ اور کرس گیل نے آغاز کیا۔ تاہم دوسری ہی گیند پراسمتھ بولڈ ہوگئے۔
تاہم کرس گیل نے زمبابوے کے چھکے چھڑا دئیے ورلڈکپ کے چھٹے میچ میں کالی آندھی ایسے چلی کے زمبابوے کے پیروں سے زمین کھیچ لی۔
کرس گیل نے شانداردوسو پندرہ رنز بناکر ورلڈ کپ میں ریکارڈ اپنے نام کرلیا،مارلون سیمیولز نے ایسا بلا گھمایا کہ زمبابوے کے بولرز ڈر کے مارے بالنگ ہی کرانا بھول گئے۔
انہوں نے ایک سو تینتیس رنز بنا ئے اور ناٹ آؤٹ رہے، کرس گیل کی دھواں دار بیٹنگ کے سامنے بالرز سمیت فیلڈرز کی بھی ایک نہ چلی۔
ڈر کے مارے فیلڈرز کے ہاتھوں سے بھی بال چھٹتی رہی۔ پر آخر کارآخری گیند پر کرس گیل کا کیچ پکڑنے میں کامیاب ہو ہی گئے۔
