پارا چنار: تحریک انصاف کے چیئرمین عمران خان نے کہا ہے کہ وزیراعظم کو پارہ چنار ضرور آنا چاہیے تھا، پارا چنار دھماکوں کے متاثرین کی آواز ہر فورم پر اٹھائیں گے۔
تفصیلات کے مطابق چیئرمین تحریک انصاف سیکیورٹی کلیئرنس ملنے کے بعد وزیراعلیٰ خیبرپختونخواہ کے ہمراہ اسلام آباد سے بذریعہ ہیلی کاپٹر پارا چنار پہنچے اور وہاں 7 روز سے دھرنے میں بیٹھے متاثرین سے اظہار یکجہتی کیا۔
Parachinar today: Condoled with bereaved families & stated we will not allow any international intrigue to divide our nation. pic.twitter.com/sV6aWlilMN
— Imran Khan (@ImranKhanPTI) June 30, 2017
عمران خان نے دھرنے کے مقام پر پہنچ کر پارا چنار دھماکوں میں جاں بحق افراد کے لواحقین سے اظہار ہمدردی کیا اور کہا کہ ہم متاثرین کے غم میں برابر کے شریک ہیں۔ انہوں نے کہا کہ دھماکوں کے متاثرین کی آواز ہر فورم پر اٹھائیں گے۔
چیئرمین تحریک انصاف نے کہا کہ وزیراعظم کو پارا چنار ضرور آنا چاہیے تھا مگر افسوس وہ نہ آئے۔ عمران خان نے مطالبہ کیا کہ قبائلی علاقوں سے ایف سی آر ختم کر کے انہیں خیبرپختونخواہ میں شامل کیا جائے۔
قبل ازیں آرمی چیف آف اسٹاف پارا چنار پہنچے اور انہوں نے قبائلی عمائدین سے ملاقات کی، عمائدین اور جنرل قمر جاوید باجوہ کی ملاقات نتیجہ خیز ثابت ہوئی جس کے بعد وہاں کے لوگوں نے 8 روز سے جاری دھرنا ختم کرنے کا اعلان کردیا۔
