ایڈیلیڈ :آئی سی سی نے ٹیسٹ کرکٹ کی تاریخ کے پہلے ڈے اینڈ نائٹ ٹیسٹ کا اعلان کردیا، جو آسٹریلیا اور نیوزی لینڈ کے درمیان ایڈیلیڈ اوول کھیلا جائے گا۔
پہلے ون ڈے اور پھر ٹوینٹی کے بعد اب ٹیسٹ بھی ڈے اینڈ نائٹ ہوگا، جس کے لیے ستائیس نومبر کو آسٹریلیا اور نیوزی لینڈ کی ٹیمیں آمنے سامنے ہوں گی، جو تجرباتی بنیاد پر ایڈیلیڈ اوول میں کھیلا جائے گا۔
اس ٹیسٹ میں گیند بھی گلابی رنگ کی ہوگی، یہ کرکٹ کی تاریخ کا پہلا ٹیسٹ ہوگا، جو ڈے اینڈ نائٹ کھیلا جائے گا۔
ٹیسٹ فارمیٹ میں ڈے اینڈ نائٹ میچ کی تجویز پاکستان کی جانب سے دی گئی تھی، جس کے لیے ابتدائی طور پر قائداعظم ٹرافی کا دوہزار دس اور گیارہ کا فائنل ڈے نائٹ کرایا گیا تھا۔
جو تیرہ سے سترہ جنوری دو ہزار گیارہ تک کراچی کے نیشنل اسٹیڈیم میں کھیلا گیا تھا، جس کا جائزہ لینے کے لیے آئی سی سی کے سی ای او ڈیو رچرڈسن خصوصی طور پر پاکستان آئے تھے۔
