کراچی : پاکستان اسٹیٹ آئل نے واجبات کی ادائیگی نہ ہونے پر پی آئی اے کو ایندھن کی فراہمی بند کر دی ہے، دوسری جانب چیئرمین پی آئی اے کا کہنا ہے کہ پی ایس او انتظامیہ سے بات چیت چل رہی ہے مسئلے کو جلد حل کرلیں گے۔
پی ایس او ترجمان کے مطابق پاکستان اسٹیٹ آئل نے پی آئی اے کو بارہ ارب روپے کی ادا ئیگی کیلئے آج کی ڈیڈ لائن دی تھی جو کہ صبح گیارہ بجے ختم ہوگئی ہے ، ادائیگی نہ ہونے اور ڈیڈ لائن ختم ہونے کے باعث پی آئی اے کو فیو ل کی فراہمی روک دی گئی ہے ۔
پی ایس او ترجمان کے مطابق پی ایس او اس وقت شدید مالی مشکلات کا شکار ہے، پی ایس او کو خام تیل کی بیرونی ادائیگیوں کیلئے فوری طور پر رقم کی ضرورت ہے، پی آئی اے کے علاوہ نجی پاور پلانٹس سے بھی پی ایس او کو ایک سو اڑسٹھ ارب روپے وصول کرنے ہیں۔
دوسری جانب ابو ظہبی اور سعودی عرب کی فیول کمپنیوں نے پی آئی اے سے واجبات طلب کرلئے ہیں، پی آئی اے نے چھ ملین ڈالر سے زائد واجبات ادا نہیں کئے ہیں، جس کے باعث فیول بند کرنے کی دھمکی دیدی ہے، اس صورتحال کے باعث دبئی اور سعودی عرب جانیوالی پروازوں کا شیڈول بھی متاثر ہونے کا خدشہ ہے۔
