کراچی/لاہور: پی آئی اے انتظامیہ کی ناقص کارکردگی کی وجہ سے قومی ائیرلائن کو کروڑوں کا نقصان ہورہا ہے۔ گذشتہ بارہ گھنٹوں کے دوران دوپروازیں فنی خرابی کے باعث اڑان کے فوری بعد واپس اتارلی گئی ہیں۔
باکمال لوگ لاجواب سروس کے نعرے کے برعکس پاکستان انٹرنیشنل ائیرلائنز کی ناقص کارکردگی سے ایک طرف تو قومی ادارے کو کروڑوں روپے کا نقصان ہورہا ہے تو دوسری جانب سیکڑوں مسافروں کو پریشانی کا سامنا بھی کرنا پڑرہا ہے۔
قومی ایئرلائن کے طیاروں میں فنی خرابی کی وجہ سے پروازیں واپس اتارے جانے کے واقعات میں اضافہ ہوگیا ہے۔ گذشتہ بارہ گھنٹوں میں دوپروازیں ٹیک آف کے فورا بعد اتارلی گئی ہیں۔
لاہورسے مسقط جانیوالی پی کے ٹو ٹو نائن ائیر بس اڑان کے فوری بعد فنی خرابی کے باعث واپس اتار لی گئی جبکہ ٹورنٹو سے کراچی آنے والی پی کے سیون ایٹ ٹو کو بھی ٹیک آف کرتے ہی اتارنا پڑگیا۔
پی آئی اے کا گرتا ہوا انجینئرنگ کا معیار سول ایوی ایشن اتھارٹی کی تکنیکی صلاحیت پر بھی سوالیہ نشان ہے۔
