اسلام آباد : ڈی آئی خان کے علاقے درازندہ میں چیک پوسٹ پر فتنہ الخوارج کے دہشت گردوں کے حملے میں ایف سی کے 10 جوان شہید اور 3 زخمی ہوگئے۔
تفصیلات کے مطابق ترجمان وزارت داخلہ کی جانب سے بیان میں کہا گیا کہ فتنہ الخوارج کے دہشت گردوں نے ڈیرہ اسماعیل خان کے علاقے درازندہ میں زام ایف سی چیک پوسٹ پر رات کی تاریکی میں بھاری ہتھیاروں سے حملہ کیا۔
خوارجی دہشت گردوں کا بہادری سے مقابلہ کرتے ہوئے ایف سی کے 10 جوان شہید اور 3 زخمی ہوگئے۔
ترجمان وزارت داخلہ نے بتایا کہ شہید جوانوں نے جانیں نچھاور کرکے خوارجی دہشتگردوں کا چیک پوسٹ پر حملہ ناکام بنایا۔
شہید ہونے والے ایف سی کے 6 جوانوں کا تعلق جنوبی وزیرستان جبکہ 4 جوانوں کا تعلق ضلع کرک سے تھا۔
شہداء میں نائب صوبیدار محمد جان، نائیک عارف، لانس نائیک سعید الرحمان، سپاہی اخونزادہ، سپاہی حضرت اللہ، سپاہی مشتاق، سپاہی عبدالصمد، سپاہی عمران، سپاہی بصیر اور سپاہی مہتاب شامل ہیں۔
زخمی ایف سی اہلکاروں نائیک حمزہ، سپاہی حسن اور سپاہی صابر ایوب کو علاج کے لیے سی ایم ایچ ہسپتال ڈیرہ اسماعیل خان منتقل۔ کردیا گیا ہے۔
،ترجمان وزارت داخلہ نے ایف سی کے شہداء کو خراج عقیدت پیش کرتے ہوئے کہا کہ ایف سی دہشت گردی کی لعنت کے خاتمے اور قیام امن کیلئے پر عزم ہے اور شہداء کی عظیم قربانیاں ہمارے غیر متزلزل عزم کو مزید مضبوط کرتی ہیں۔
