افغانستان کے دارالحکومت کابل میں نیٹو کے قافلے پر خودکش حملے میں تین فوجی ہلاک ہوگئے، افغان طالبان نے نیٹو کے قافلے پر حملے کی ذمہ داری قبول کرلی۔
غیرملکی خبر رساں ایجنسی کے مطابق خودکش حملہ آور نے بارود سے بھری کار کابل کےعلاقے پل چرخی کے مقام پر نیٹو کے قافلے سے ٹکرادی، بم دھماکے کے نتیجے میں تین فوجی مارے گئے اور متعدد زخمی ہوگئے۔
دھماکے کے فوری بعد سیکیورٹی اہلکاروں نے علاقے کو گھیرے میں لے کر سرچ آپریشن شروع کردیا، تاہم کوئی گرفتاری عمل میں نہیں لائی گئی، افغان طالبان کے ترجمان ذبیح اللہ مجاہد نے میڈیا کو فون کرکے حملے کی ذمہ داری قبول کرلی اور دعوی کیا کہ مجاہدین نے نیٹو کو بڑے پیمانے پر جانی ومالی نقصان پہنچایا ہے۔
