کراچی: شہرِ قائد کے مختلف علاقوں میں فائرنگ اور پُرتشدد واقعات کے دوران خاتون ج ں بحق دو افراد زخمی ہوگئے، گذشتہ روز لیاری میں تین سیاسی کارکنان کی ہلاکت کے بعد علاقے میں کشیدگی پائی جاتی ہے۔
پولیس کے مطابق کراچی کے علاقے کورنگی ابراہیم حیدری کے قریب سے ایک خاتون کی لاش ملی، جسے تشدد کرکے قتل کیا گیا تھا، لاش کو ضابطے کی کاروائی کیلئے جناح اسپتال منتقل کردیا گیا، بوٹ بیسن کے علاقے میں جھگڑے کے دوران فائرنگ سے ایک شخص زخمی ہوا۔
گذشتہ روز لیاری میں جمعہ ہال کی قریب نامعلوم افراد نے کلینک پر اندھا دھند فائرنگ سے تین افراد عنایت بخش بلوچ، محمد حنیف اور محمد اعجاز جاں بحق ہوگئے جبکہ فائرنگ کے نتیجے میں زخمی ہونیوالے عبدالشکور کی حالت تشویشناک بتائی جارہی ہے، تینوں جاں بحق افراد کا تعلق پیپلز پارٹی سے بتایا جاتاہے۔
واقعے کے بعد علاقے میں سخت کشیدگی پائی جاتی ہے، پولیس اوررینجرز کو بھی متاثرہ علاقے میں تعینات کیا گیا ہے۔
