پشاور: کراچی میں بارہ سو سے زائد افراد کو لقمہ اجل بنانے کے بعد پشارو میں بھی ہیٹ اسٹروک کے مریض سامنے آگئے، پی ڈی ایم اے نے گرمی کے پیشِ نظر الرٹ جاری کر دیا ہے، پی ڈی ایم اے نے ہدایات جاری کی ہیں کہ شہری ہیٹ اسٹروک سے بچنے کےلیے باہر جانے سے گریز کریں۔
پشارو میں دو دن سے گرمی کے چڑھتے ہوئے پارے سے شہری بلبلا اٹھے، دن میں گرم ہوا اور رات میں حبس بڑھنے کی وجہ سے روزہ دار بے حال ہے، وزیرِ صحت خیبر پختونخواہ شیرام ترکئی کا کہنا ہے کہ پشاور میں شدید گرمی کے باعث ہسپتالوں میں ایمرجنسی نافذ کردی گئی ہے۔
اسپتالوں میں مریضوں کی دیکھ بھال یقینی بنانے کیلئے اقدامات کئے گئے ہیں۔
طبی ماہرین کا کہنا ہے کہ ہیٹ اسٹروک سے بچنے کے لئے شہری بلاضرورت باہر نہ نکلیں، چھتری کا استعمال کریں اور سر کو گیلے کپڑے سے ڈھانپ دیں، جسم کا درجہ حرارت نارمل رکھنے کے لئے بار بار نہائیں۔
