پاکستان کے شاہد آفریدی ون ڈے میں تیز ترین سینچری کے ریکارڈ سے محروم ہوگئے، نیوزی لینڈ کے کورے اینڈرسن نے ویسٹ انڈیز کے خلاف ون ڈے کی تیز ترین سینچری کا نیا عالمی ریکارڈ بنا ڈالا۔
شاہد آفریدی کی وہ دھواں دھار اننگز جس نے دنیائے کرکٹ میں ان کی منفرد پہنچان بنائی اور وہ بوم بوم کے نام سے مشہور ہوگئے لیکن شاہد آفریدی کا یہ ریکارڈ اب نیوزی لینڈ کے کھلاڑی نے توڑ دیا ہے۔
سال دو ہزار چودہ کا پہلا دن اور پہلا نیا عالمی ریکارڈ قائم ہوگیا، نیوزی لینڈ کے کورے اینڈرسن نے سترہ سال بعد ون ڈے کی تیز ترین سینچری کا نیا ریکارڈ بنا ڈالا۔
اینڈرسن نے ویسٹ انڈیز کے خلاف کوئنز ٹاؤن میں کھیلے جانے والے ون ڈے میں چھتیس گیندوں پر سینچری بنائی، اینڈرسن نے چھتیسویں گیند پر چھکا لگا کر شاہد آفریدی کی تیز ترین سینچری کا ریکارڈ توڑا۔
اینڈریسن کی شاندار سینچری بارہ چھکوں اور چار چوکوں سے سجی تھی، شاہد آفریدی نے انیس سو چھیانوے میں نیروبی کے میدان میں سینتیس گیندوں پر ایک روزہ کرکٹ کی تیز ترین سینچری بنائی تھی، آفریدی کی سینچری میں گیارہ چھکے اور چھ چوکے شامل تھے۔
