جھنگ : سیلاب نے جھنگ کا رخ کرلیا ہے، ہیڈ تریموں پر پانی کا بہاؤ پانچ لاکھ کیوسک سے بڑھ گیا ہے، ہیڈ پنجند پر ہنگامی حالت نافذ کردی گئی ہے اور فوج کے چارسو جوان اور تیس کشتیاں روانہ کر دی گئیں ہیں۔
سیلابی ریلا جنوبی پنجاب میں تباہی مچاتا آگے بڑھ رہا ہے، احمد پور سیال کے قریب دریائے چناب میں ہیڈ تریموں کے مقام پر انتہائی اونچے درچے کا سیلاب ہے جہاں پانی کا بہاؤ پانچ لاکھ نو ہزار چارسو کیوسک ہے جبکہ ہیڈ پنجند پر ہنگامی حالت نافذ کر کے فوج کے چار سو جوان اور تیس کشتیاں روانہ کر دی گئی ہیں۔
جھنگ کے علاقے موضع وجھلانا کے قریب بند میں شگاف پڑنے سے سیلابی ریلا بکھر روڈ پر آگیا ہے، سیلابی پانی بھوانہ شہر میں داخل ہونے سے چنیوٹ اور بھوانہ کا زمینی رابطہ منقطع ہوگیا ہے۔
دریائے جہلم سے ملحقہ پیالہ بند میں تریموں کے مقام پر شگاف پڑ گیا ہے اور لوگوں کو علاقہ خالی کرنے کی ہدایت کر دی گئی ہے، جلال پور بھٹیاں میں ایک لاکھ ایکڑ اراضی زیرآب آگئی جبکہ حافظ آباد کے دو سو دیہات سیلاب میں گھرے ہوئے ہیں۔
دریائے چناب نے کوٹ مومن کے بیالیس دیہات کو پانی پانی کر دیا ہے۔
