مردان : صوبہ خیبر پختونخوا کے شہر مردان میں رکشے میں سوار دو خواتین کے قتل کا واقعہ پیش آیا ہے، ملزم نے فائرنگ کرکے دونوں کو موت کے گھاٹ اتار دیا۔
پولیس کے مطابق واقعہ کاٹلنگ روڈ پر پیش آیا، جہاں مبینہ طور پر شوہر نے خلع مانگنے پر اپنی بیوی اور اس کی بہن کو فائرنگ کرکے قتل کردیا، دونوں خواتین رکشہ میں سوار تھیں۔
واردات کے بعد ملزم جائے وقوعہ سے فرار ہوگیا، واقعے میں دو بچے بھی زخمی ہوئے لاشوں کو پوسٹ مارٹم اور زخمیوں کو طبی امداد کیلیے مردان میڈیکل کمپلیکس منتقل کردیا گیا۔
پولیس کا کہنا ہے کہ فرار ہونے والا ملزم جاں بحق ہونے والی ایک خاتون کا شوہر جبکہ دوسری خاتون کا بہنوئی ہے۔
مردان پولیس حکام کے مطابق ملزم کی بیوی نے شوہر سے خلع حاصل کرنے کیلئے عدالت میں مقدمہ کر رکھا ہے، واقعے کا مقدمہ درج کرکے ملزم کی تلاش شروع کردی گئی ہے۔
نامعلوم افراد کی فائرنگ، پولیس اہلکار جاں بحق
علاوہ ازیں خیبر کے علاقے جمرود غنڈی روڈ پر نامعلوم مسلح افراد نے گاڑی پر فائرنگ کردی جس کے نتیجے میں ایک پولیس اہلکار جاں بحق اور 2 افراد شدید زخمی ہوگئے۔
ملزمان کی فائرنگ سے پولیس اہلکار عابد آفریدی موقع پر دم توڑ گیا، ملزمان موقع سے فرار ہونے میں کامیاب ہوگئے جن کیخلاف سرچ آپریشن و تحقیقات کا آغاز کردیا گیا ہے۔
