اسلام آباد : پاکستان میں سیلاب کی حالیہ صورتحال اور دیگر معاشی مشکلات کے پیش نظر مالی سال کے پہلے5ماہ میں ترقیاتی منصوبے سست روی کا شکار رہے۔
حکومت کے مجموعی اخراجات میں اضافے کی وجہ سے رواں مالی سال کے اوائل میں پاکستان کے ترقیاتی اخراجات تقریباً 45 فیصد سے کم ہوکر 99 ارب روپے سے بھی کم ہوگئے۔
اس حوالے سے ذرائع کا کہنا ہے کہ وزارت خزانہ کی دستاویز کے مطابق مالی سال کے پہلے5ماہ میں ترقیاتی منصوبوں پر130ارب63کروڑ روپے خرچ کیے جاسکے۔
جولائی تا نومبر کے مہینوں میں وفاقی ترقیاتی پروگرام کے تحت224ارب53کروڑ سے زائد رقم جاری اور کابینہ ڈویژن کے ترقیاتی منصوبوں پر11ارب روپے سے زائد کی رقم خرچ کی گئی۔
دستاویز میں کہا گیا ہے کہ چاروں صوبوں سمیت گلگت بلتستان اور امور کشمیر کے ترقیاتی منصوبوں پر18ارب روپے سے زائد اور اعلٰی تعلیمی کمیشن کے ترقیاتی منصوبوں پر3ارب14کروڑ روپے سے زائد خرچ کئے گئے۔
اس کے علاوہ وزارت مکانات و تعمیرات کے ترقیاتی منصوبوں پر2ارب روپے سے زائد رقم، وزارت آبی وسائل کے ترقیاتی منصوبوں پر20ارب روپے سے زائدرقم خرچ کی گئی۔
وزارت خزانہ کی جاری دستاویز میں کہا گیا ہے کہ نیشنل ہائی وے اتھارٹی کے منصوبوں پر21ارب روپےسے زائد کی رقم جبکہ این ٹی ڈی سی اور پیپکو کے منصوبوں پر34ارب43کروڑ روپے سے زائد خرچ کئے گئے۔
