کراچی : علی محمد گوٹھ میں زہریلی گیس سے اٹھارہ اموات پر مزید دس مقدمات درج کر لئے گئے، جس کے بعد مجموعی درج مقدمات کی تعداد11ہوگئی ہے۔
تفصیلات کے مطابق کراچی کےعلاقے علی محمد گوٹھ میں زہریلی گیس سے18اموات کے معاملے پر مزید10 مقدمات درج کرلئے گئے۔
پولیس نے بتایا کہ تھانہ موچکومیں مقدمات عدالتی حکم پرلواحقین سے رابطہ کرکے درج کیے گئے، تمام مقدمات میں جاں بحق افراد کے لواحقین کو مدعی بنایا گیا ہے۔
حکام کا کہنا ہے کہ مقدمات میں قتل بالسبب اور دیگر دفعات شامل کی گئی ہیں اور علی محمد گوٹھ میں غیرقانونی طورپر قائم فیکٹریز کے مالکان کو نامزد کیا گیا ہے۔
پولیس نے کہا ہے کہ واقعات کےحوالے سے مجموعی طور پر درج مقدمات کی تعداد11ہوگئی ہے۔
مدعیان نے بیان میں کہا ہے کہ علی محمد گوٹھ میں ری سائیکلنگ فیکٹریاں کام کر رہی ہیں، کارخانوں سے مضر صحت دھواں ،تعفن سےماحولیاتی آلودگی پیدا ہوتی ہے۔
مدعیان کے مطابق ماحولیاتی آلودگی کے اثرات صحت کیلئے کافی خطرناک اورجان لیوا ثابت ہوئے،دھویں تعفن ماحولیاتی آلودگی سے بیماریاں اوراموات ہوئیں، اموات فیکٹری مالکان کی غفلت کی وجہ سے ہوئیں،کارروائی کی جائے۔
