اسلام آباد: وفاق کے تحت چلنے والے تعلیمی اداروں میں دسویں اور بارہویں جماعت کی کلاسز آج سے شروع کرنے کا فیصلہ کرلیا گیا، والدین نے شدید موسم گرما میں اسکول کھولنے پر تحفظات کا اظہار کیا ہے۔
تفصیلات کے مطابق وزارت تعلیم نے دسویں اور بارہویں جماعت کی کلاسز آج سے شروع کرنے کا فیصلہ کرلیا، کلاسز شروع کرنے کا نوٹی فکیشن جاری کر دیا گیا۔
آٹھویں، نویں اور گیارہویں جماعت کی کلاسز شیڈول کے مطابق 7 جون سے شروع ہوں گی، نوٹیفکیشن کے اجرا میں تاخیر کے باعث تعلیمی اداروں میں حاضری نہ ہونے کے برابر ہے۔
تعلیمی اداروں کے اوقات کار پر والدین نے بھی خدشات کا اظہار کیا ہے، والدین کا کہنا ہے کہ عام حالات میں جون میں گرمیوں کی چھٹیاں ہوتی تھیں، 8 سے 1 بجے تک کلاسز سے بچے شدید متاثر ہوں گے۔
والدین کا کہنا ہے کہ جون کی شدید گرمی میں تعلیمی اداروں کا کھولنا طلبہ کی صحت سے مذاق ہے۔
