باسمتی چاول جس کو 1121 چاول بھی کہا جاتا ہے دنیا بھر میں اپنی بہترین لمبائی، خوشبو، ذائقے دار اور شاندار کوکنگ کی وجہ سے پہچانا جاتا ہے۔
باسمتی چاول دنیا بھر میں ایک مرغوب غذا کے طور پر استعمال کیے جاتے ہیں، اس کو 1121 اس لیے بھی کہا جاتا ہے کیونکہ پکنے کے بعد یہ مزید لمبا ہو سکتا ہے۔
یہ چاول ہمالیہ کے زرخیز میدانوں سے آتے ہیں، اس چاول کو بڑے پیمانے پر بریانی، فرائیڈ رائس اور پلاؤ بنانے کے لئے خاص طور پر استعمال کیا جاتا ہے۔
باسمتی چاول 1121 اعلیٰ درجے کی لمبے دانے والی خوشبو دار قسم ہے جو اپنی بہترین کوالٹی، نرم ساخت اور منفرد خوشبو کے لیے مشہور ہے۔
بہترین چاول کا انتخاب کیسے کیا جائے؟
مارکیٹ میں دستیاب مختلف برانڈز کے چاول کی درجنوں اقسام میں سے بہترین 1121 باسمتی چاول کا انتخاب کیسے کیا جائے؟
زیر نظر مضمون میں ان اہم نکات اور اس کی خصوصیات پر تفصیلی گفتگو کی گئی ہے جس سے آپ کو باسمتی چاول کے درست انتخاب میں مدد ملے گی۔
چاول کی لمبائی اور شکل
کیتے ہیں کہ چاول جتنا لمبا ہوگا اتنا ہی بہتر کوالٹی میں شمار ہوگا، 1121 باسمتی چاول اپنی غیر معمولی لمبائی کے لیے مشہور ہے، جو عموماً 8ملی میٹر سے زیادہ ہوتی ہے۔
خریدتے ہوئے لمبے دانے والا چاول ہی منتخب کریں کیونکہ یہ اعلیٰ معیار کی علامت ہے اور پکنے کے بعد اس کے پھولنے کی صلاحیت میں مزید اضافہ ہوجاتا ہے۔
یہ خیال رہے کہ چاول کے دانے یکساں سائز اور شکل کے ہونے چاہئیں اور اس میں ٹوٹے یا بد رنگ دانے بالکل نہ ہو بلکہ کم سے کم ہوں، اس سے چاول کی بہترین پروسیسنگ اور اس کے اعلیٰ معیار کا پتہ چلتا ہے۔
اس بات کا بھی دھیان رکھیں کہ چاول کے دانے سفید موتی جیسے یا ہلکے سنہری رنگ کے ہونے چاہئیں۔ دھندلے یا زیادہ پیلے رنگ کے چاولوں سے گریز کریں کیونکہ یہ شکل زائد المعیاد ہونے یا خراب اسٹوریج کا نتیجہ بھی ہوسکتی ہے۔
خوشبو اور ذائقہ
باسمتی چاول 1121 اپنی منفرد مہک کے لیے مشہور ہے، جو گری دار، پھولوں جیسی یا ہلکی میٹھی محسوس ہوتی ہے۔ خریدنے سے پہلے چاول کو سونگھیں اگر خوشبو خوشگوار ہو تو یہ اعلیٰ معیار کی نشانی ہے۔
چاول خریدتے ہوئےاگر ممکن ہو تو اس کا ذائقہ چیک کریں، اگر آپ چکھ کر دیکھ سکتے ہیں تو ایسے چاول منتخب کریں جن میں ہلکی گری دار میٹھی خوشبو ہو جو دیگر اجزاء کے ساتھ متوازن رہے۔
پکنے کی خصوصیات
پکنے کے بعد 1121 باسمتی چاول کا ہر دانہ الگ اور نرم ہونا چاہیے، ایسا چاول منتخب نہ کریں جو چپچپا یا آپس میں جڑنے لگے، معیاری باسمتی چاول یکساں اور مستقل طور پر پک جاتا ہے، جس سے ہر دانہ بہترین طریقے سے تیار ہوتا ہے۔
معیاری اور خالص پن
باسمتی چاول کے پیکٹ پر دی گئی معلومات کو پڑھ کر لازمی چیک کریں، جیسے کہ چاول کی اصل، چکی میں پراسیسنگ کا طریقہ اور کسی بھی اضافی اجزاء یا کیمیکلز کی موجودگی سے متعلق آگاہی حاصل کریں۔ اس کے علاوہ معروف اور معتبر برانڈز کا انتخاب کریں جن کے معیار پر بھروسہ کیا جاسکتا ہو۔
چاول کو اچھی طرح ذخیرہ کرنے کیلیے انہیں ٹھنڈی اور خشک جگہ پر رکھیں جہاں براہ راست دھوپ یا تیز خوشبو والی اشیاء موجود نہ ہوں۔
باسمتی چاول پکانے کا طریقہ
چاول پکانے سے پہلے ان کو ٹھنڈے پانی سے دھو کر اس میں موجود اضافی نشاستہ اور میل کچیل نکال دیں۔ پکانے سے پہلے چاول کو 30 منٹ کے لیے پانی میں بھگونا ضروری ہے تاکہ دانے لمبے اور یکساں پک سکیں۔ ان میں پانی درست تناسب میں شامل کریں۔
چاول کو صرف اتنا پکائیں کہ وہ نرم ہو جائیں، پھر ایک چمچے سے ہلکے ہاتھوں سے چاول کو پھیلا دیں تاکہ دانے الگ الگ رہیں۔
اوپر بیان کی گئی ہدایات پر عمل کرنے سے آپ 1121 باسمتی چاول کا انتخاب بہتر طریقے سے کر سکیں گے اور اپنی پسندیدہ ڈشز جیسے کہ خوشبو دار بریانی، مزیدار پلاؤ یا سادہ چاول کو مزید ذائقے دار بناسکیں گے۔
