کراچی : پی آئی اے کی دس سالہ تاریخ میں پہلی بار12 بوئنگ 777 طیارے آپریشن میں مکمل فعال کردئیے گئے، طیارے کینیڈا، برطانیہ ، یورپ سمیت حج آپریشن میں حصہ لے رہے ہیں۔
تفصیلات کے مطابق پی آئی اے میں اصلاحات کا عمل تاحال جاری ہے، ادارے کی دس سالہ تاریخ میں پہلی بار تمام بوئنگ 777 طیارے آپریشن میں مصروف ہیں۔
پی آئی اے کے سی ای او ایئرمارشل ارشد ملک کی کاوشوں اور شعبہ انجنیئرنگ نے بارہ777 طیاروں کو اڑان کے قابل بنایا ہے۔
اس حوالے سے ترجمان پی آئی اے کا کہنا ہے کہ گزشتہ دس سالوں کے دوران دو سے چار طیارے ہمیشہ گراؤنڈ رہتے تھے، پی آئی اے کے بوئنگ 777 طیارے کینیڈا، برطانیہ ، یورپ سمیت حج آپریشن میں حصہ لے رہے ہیں۔
قومی ایئرلائن کی تاریخ میں پہلی مرتبہ تمام بوئنگ777طیارے آسمان میں اڑان بھررہے ہیں، پی آئی اے کی دس سالہ تاریخ میں یہ پہلا موقع ہے جب کوئی بھی بوئنگ طیارہ گراونڈ نہیں ہے۔
پی آئی اے کا فلیٹ مجموعی طور پر31 جہازوں پر مشتمل ہے۔ اس اقدام کا بنیادی مقصد مسافروں کو دور جدید کی سہولیات فراہم کرنا ہے۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں