راجن پور : کچے کے علاقے میں پولیس کے آپریشن کے دوران سنگین جرائم میں ملوث گینگز کے 12 انتہائی مطلوب ڈاکوؤں نے سرنڈر کردیا۔
تفصیلات کے مطابق راجن پور میں کچے کے علاقے میں پولیس کا ڈاکوؤں کے خلاف آپریشن49 ویں روزبھی جاری ہے۔
آپریشن کے دوران سنگین جرائم میں ملوث گینگز کے 12 انتہائی مطلوب ڈاکوؤں نے سرنڈرکردیا،ڈی پی اوراجن پور محمد ناصر نے بتایا کہ ڈاکوؤں سےبھاری تعداد میں اسلحہ اور ایمونیشن برآمد ہوا ہے۔
ڈی پی او راجن پور کا کہنا تھا کہ سرنڈر کرنے والے ڈاکو درجنوں مقدمات میں پولیس کو مطلوب تھے۔
محمد ناصر نے مزید بتایا کہ چک کپڑا میں ڈاکوؤں کی کمین گاہوں کی جانب پولیس کی پیش قدمی جاری ہے ، پٹ گینگ اور گورا گینگ کے ڈاکوؤں کی جانب سے مزاحمت اور فائرنگ کا تبادلہ جاری ہے۔
ان کا کہنا تھا کہ پولیس نےبھاری اسلحہ اور بکتربند گاڑیوں کےساتھ علاقے کاگھیراؤکرلیا، اب تک آپریشن میں سرنڈر کرنے والے ڈاکوؤں کی تعداد 25 ہوگئی۔
ڈی پی اوراجن پور نے کہا کہ آپریشن میں 7 ڈاکو ہلاک اور 43 ڈاکو گرفتار کئے جا چکے ہیں۔
