کراچی : مشرف کالونی میں12سالہ بچی پربدترین تشدد کا واقعہ سامنے آیا ہے، سوتیلی ماں نے لوہے کی گرم سلاخ سے بچی کو داغا۔
تفصیلات کے مطابق کراچی کے علاقے موچکو میں سوتیلی ماں کے تشدد سے زخمی ہونے والی 12سالہ بچی کو تشویشناک حالت میں اسپتال منتقل کردیا گیا۔ پولیس کا کہنا ہے کہ بچی پر گرم آہنی راڈ سے تشدد کیا گیا۔
پڑوسیوں نے بچی پرتشدد دیکھ کر اس کی ویڈیو بنالی، سوشل میڈیا پر ویڈیو دیکھنے کے کے بعد پویس نے فوری ایکشن لیا، بچی کی شناخت انوشہ کے نام سے ہوئی ہے۔
ایس ایس پی کیماڑی راؤ عارف اسلم نے میڈیا کو بتایا کہ بچی کے والد اور سوتیلی ماں کو حراست میں لے لیا گیا ہے، بچی کے جسم پر تشدد اور جلائے جانے کے واضح نشانات ہیں۔
پولیس حکام کے مطابق متاثرہ 12سال کی بچی کو سول اسپتال میں طبی ماداد دی جارہی ہے، بچی کے والد اور سوتیلی ماں سے تفتیش کی جارہی ہے۔
پولیس حکام کا کہنا ہے کہ بچی کے والد کا نام عمران الٰہی اورسوتیلی والدہ کانام گلناز ہے، موچکو تھانے میں اقدام قتل کی دفعات کے تحت سرکار کی مدعیت میں مقدمہ درج کرلیا گیا،ایم ایل او کی رپورٹ کے بعد مزید قانونی کارروائی عمل میں لائی جائے گی۔
یاد رہے کہ سوشل میڈیا پرتشدد زدہ 12سالہ بچی کی ویڈیو وائرل ہوئی تھی، واقعے میں ملوث بچی کی سوتیلی ماں اور باپ کو گزشتہ روز گرفتار کرلیا گیا تھا۔
