لاہور: سعودی عرب کی جیلوں میں قید پاکستانیوں کا وطن واپسی کا سلسلہ جاری ہے، سعودی ائیر لائن کی پرواز سے مزید 126 پاکستانی پاکستان واپس پہنچ گئے۔
تفصیلات کے مطابق سعودی ولی عہد کے حکم پر رہائی پانے والے قیدیوں کی آمد کا سلسلہ شروع ہوگیا، گزشتہ روز لاہور ائیرپورٹ پر 5 پاکستانی شہری پہنچے جنہیں کلیئرنس کے بعد ایف آئی اے نے گھر جانے کی اجازت دی۔
جدہ سے سعودی ائیرلائن کی پرواز سے مزید 126 پاکستانی شہری لاہور پہنچ گئے جنہیں فیڈرل انویسٹی گیشن ایجنسی نے جانچ پڑتال کے بعد گھروں کو جانے کی اجازت دے دی۔
مزید پڑھیں: سعودی جیلوں میں قید پاکستانیوں کا وطن واپسی کا سلسلہ شروع ہوگیا
پاکستان پہنچنے والے تمام پاکستانیوں نے ائیرپورٹ پر اترتے ہی سجدہ شکر کیا اور عمران خان کی قیدیوں کی رہائی کے حوالے سے کاوش پر خیرمقدم بھی کیا۔
یاد رہے کہ سعودی ولی عہد محمد بن سلمان کے دورہ پاکستان کے موقع پر وزیر اعظم عمران خان نے درخواست کی تھی کہ سعودی عرب کی مختلف جیلوں میں پاکستانی قید ہیں۔
عمران خان کی درخواست پر ولی عہد نے حکومت کو چھوٹے جرائم میں جیل کاٹنے والے 2107 پاکستانیوں کی رہائی کا حکم دیا تھا جس کے بعد اُن کے اہل خانہ خوشی سے آبدیدہ ہوگئے تھے۔ نمائندہ اے آر وائی حسن حفیظ کے مطابق اب تک 150 سے زائد پاکستانی وطن واپس پہنچ چکے ہیں۔
یہ بھی پڑھیں: سعودی جیلوں سے پاکستانیوں کی رہائی، جدہ جیل کی ویڈیو وائرل
جدہ کے جیل میں قید پاکستانیوں کو جب اپنی رہائی کی خبر ملی تو وہاں جذباتی مناظر دیکھنے میں آئے تھے، تمام قیدی زاروقطار رونے لگے تھے۔
