گوجرانوالہ: صوبہ پنجاب کے شہر گوجرانوالہ میں ایک ماہ قبل تاوان کے لیے اغوا کیے گئے بچے کو قتل کرنے والے دو ملزمان کو پولیس نے گرفتار کرلیا۔
تفصیلات کے مطابق گوجرانوالہ میں تھانہ گرجاکھ کے علاقے سے ایک ماہ قبل تاوان کے لیے اغوا ہونے والے 13 سالہ بچے حنظلہ عرفان کی نعش نوشہرہ ورکاں کے علاقے میں کھیتوں سے برآمد کرلی گئی۔
بچے کے والدین کے مطابق حنظلہ 30 نومبر کو گھر سے دادی کو پھوپھو کے گھر چھوڑنے گیا لیکن واپس نہ آیا اس کو ہر جگہ تلاش کرنے کے بعد پولیس کو اطلاع دی گئی جس پرکوئی کاروائی نہ کی گئی۔
ملزمان نے حنظلہ کے والدین سے ایک کروڑ روپے تاوان کا مطالبہ کیا تھا جس پر پولیس کا کہنا تھا کہ بچہ اپنی مرضی سے گھر سے گیا ہے۔
پولیس حکام کے مطابق بچے کی نعش کو پوسٹ مارٹم کے لیے سول اسپتال منتقل کردیا ہے، واقعے میں ملوث دو ملزمان کو گرفتار کرلیا گیا ہے۔
گوجرہ : 4 ماہ قبل لاپتہ ہوئے بچے کی لاش کچرا کنڈی سے برآمد
یاد رہے کہ گزشتہ ماہ ٹوبہ ٹیک سنگھ کی تحصیل گوجرہ میں 4 ماہ قبل لاپتہ ہونے والے بچے کی لاش کچر کنڈی سے برآمد ہوئی تھی۔
پولیس کے مطابق گوجرہ کے علاقے سراج ٹاؤن کا رہائشی 10 سالہ بچہ رضوان 4 ماہ قبل لاپتہ ہوگیا تھا، مذکورہ بچے کو مبینہ طور پرزیادتی کے بعد قتل کیا گیا۔
