چارسدہ: پولیس نے ضعیف العمر دلہا کی نوعمر بچی سے شادی ناکام بنادی، باپ نے پیسوں کے عوض بیٹی کی شادی طے کی تھی۔
تفصیلات کے مطابق چارسدہ میں بچی کے باپ عالم سید نے 5 لاکھ روپے کے عوض معمر شخص سے بیٹی کی شادی طے کی تھی، تنگی پولیس نے بروقت مداخلت کرتے ہوئے 72 سالہ دلہا کی 13 سالہ بچی سے شادی کو کوشش ناکام بنا دی۔
پولیس نے ارمڑ پشاور سے تعلق رکھنے والے 72 سالہ حبیب خان کو گرفتار کرلیا، 13 سالہ بچی سایہ گل کا باپ عالم سید موقع سے فرار ہوگیا۔
لڑکی کے باپ اور معمر دلہا کیخلاف پولیس نے چائلڈ ایکٹ کے تحت مقدمات درج کرلیے ہیں، پولیس نے نکاح پڑھانے والے قاضی کو بھی گرفتار کرلیا ہے۔
یہ بات قابل ذکر ہے کہ پاکستان میں چائلڈ میرج ایکٹ موجود تو ہے لیکن اس پر موثر عملدرآمد نہ ہونے کے باعث ملک میں آئے روز کمسن بچیوں کی بوڑھوں سے زبردستی کی شادی کے واقعات سامنے آتے رہتے ہیں۔
کچھ عرصہ قبل پنجاب کے علاقے راجن پور میں بھی کم عمر بچی کی شادی کی کوشش کو پولیس نے ناکام بنایا تھا، پولیس نے دولہے اور دلہن کے بھائیوں کو گرفتار کیا تھا۔
اس واقوے میں 11 سالہ بچی کی شادی 40 سالہ شخص سے کرائی جارہی تھی، لڑکی کا والد فرار ہونے میں کامیاب ہوگیا تھا۔
سندھ کے شہر ٹھٹھہ میں بھی کمسن بچی کا 50 سالہ زمیندار سے زبردستی نکاح کرایا گیا تھا تاہم پولیس کی بروقت کارروائی کے باعث بچی کو بچا لیا تھا۔
