پولیس نے دعویٰ کیا ہے کہ کراچی میں گزشتہ ایک ہفتے کے دوران ڈاکوؤں سے 16 مبینہ مقابلے ہوچکے ہیں۔
تفصیلات کے مطابق کراچی پولیس کا کہنا تھا کہ ان مقابلوں میں 18 ڈاکو زخمی حالت میں گرفتار ہوئےہیں۔ گزشتہ ہفتے کے دوران 949 سے زائد ملزمان کو حراست میں لیا گیا ہے۔
ملزمان سے 40 کلو 497 گرام منشیات برآمد کی گئی، گرفتار کیے گئے اسٹریٹ کرمنلز سے 141 مختلف اقسام کا اسلحہ بھی برآمد کیا گیا۔
پولیس حکام کا مزید کہنا تھا کہ ملزمان سے مجموعی طور پر 49 موٹرسائیکلیں اور ایک گاڑی تحویل میں لی گئی ہے۔
واضح رہے کہ اس سے قبل کراچی میں اسٹریٹ کریمنلز کی جانب سے ناکہ لگا کر لوگوں کو لوٹنے کی خبر آئی تھی، ایک شہری کے بھاگنے پر ملزم نے گولی چلادی تھی۔
2 موٹر سائیکل پر سوار 4 ملزمان نے گلی میں لوٹ مار کے دوران ناکہ لگایا تھا۔ ڈاکوؤں کی ناکہ لگا کر لوٹ مار کی سی سی ٹی وی فوٹیج بھی سامنے آئی تھی مگر وہ پکڑے نہ جاسکے۔
کراچی میں اسٹریٹ کریمنلز کے ہاتھوں متعدد شہری اپنی جان گنوا چکے ہیں جبکہ حکام دعوؤں کے باوجود شہرقائد میں اسٹریٹ کرائمز پر قابو پانے میں ناکام رہے ہیں۔
