کراچی: صدر پی ٹی آئی سندھ علی زیدی پیٹرولیم مصنوعات کی قیمتوں میں اضافے کو مسترد کرتے ہوئے کہا کہ امپورٹڈ حکومت کا بس چلےتو پورا ملک آئی ایم ایف کےسپرد کردے۔
تفصیلات کے مطابق ایک بیان میں علی زیدی نے شہباز حکومت کو آڑے ہاتھوں لیتے ہوئے کہا کہ پیٹرولیم مصنوعات میں تیسری بار اضافہ کرکے امپورٹڈ حکومت نے غریب عوام کو مزید مہنگائی کےبوجھ تلےدبا دیا ہے یہ عوام دشمن فیصلہ ہے، جسے کسی صورت قبول نہیں کیا جائے گا۔
صدر پی ٹی آئی سندھ نے کہا کہ ملک کی وزارت خزانہ ایک اناڑی شخص کے ہاتھ میں ہے، نام نہاد تجربہ کاروں نے ملکی معیشت کو تباہ کردیا ہے، ہماری حکومت کے خلاف مہنگائی مارچ کرنے والی پی پی آج دوربین میں بھی دکھائی نہیں دے رہی ہے۔
علی زیدی نے کہا کہ پیٹرول کی قیمتوں میں اضافہ غریب عوام کے ساتھ ظلم اور زیادتی ہے، امپورٹڈ حکومت کو غریب عوام کی جیبوں پر مزید ڈاکہ نہیں ڈالنے دیں گے۔
پی ٹی آئی رہنما نے کہا کہ امپورٹڈ حکومت کا بس چلےتو پورا ملک آئی ایم ایف کے سپرد کردے، آئی ایم ایف کی آڑ میں امپورٹڈ وزرا اپنا خزانہ بھر رہے ہیں، امپورٹڈ حکومت پٹرولیم مصنوعات کی قیمتوں میں اضافہ فوری واپس لے، قیمتوں میں اضافے کا فیصلہ واپس نہ لیا گیا تو شدید عوامی ردعمل آئے گا۔
