واشنگٹن: امریکی ریاست فلوریڈا کے ہائی اسکول میں فائرنگ سے 17 افراد ہلاک اور درجن بھر سے زائد زخمی ہوگئے۔ پولیس نے حملہ آور کو گرفتار کرلیا۔
امریکی ریاست فلوریڈا کا ہائی اسکول ایک بار پھر فائرنگ گونج اٹھا۔ فائرنگ کے واقعے نے ملک بھر کی فضا کو پھر سوگوار کردیا۔
فائرنگ کا یہ واقعہ پارک لینڈ کے اسٹون مین ڈگلس ہائی اسکول میں چھٹی کے وقت پیش آیا جب حملہ آور نے اسکول میں گھس کر اندھا دھند فائرنگ کردی۔
کاؤنٹی پولیس چیف کا کہنا ہے کہ 19 سالہ حملہ آور نکولس کروز کو گرفتار کرلیا گیا ہے، ملزم سے رائفل اور درجنوں میگزین برآمد ہوئے ہیں۔
پولیس کے مطابق ملزم نے حملے سے پہلے کمپیوٹر پر بم بنانے پر ریسرچ بھی کی تھی۔ ملزم اسکول کا سابق طالب علم تھا، جس کو نظم و ضبط کی خلاف ورزی پر اسکول سے نکالا گیا تھا۔
امریکی صدر ڈونلڈ ٹرمپ نے اپنے ٹویٹ میں واقعے پر اظہار افسوس کرتے ہوئے ہلاک افراد کے اہلخانہ سے تعزیت کی۔
امریکی میڈیا کے مطابق فائرنگ کے وقت اسکول میں 3 ہزار سے زائد طلبہ اور 130 کے قریب اساتذہ موجود تھے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
