واشنگٹن: سابق امریکی صدر بارک اوباما، بل گیٹس اور ایلن مسک سمیت متعدد معروف افراد کے ٹویٹر اکاؤنٹ ہیک کرنے والے ملزم کو 3 سال قید کی سزا سنا دی گئی، ملزم نے ایک فراڈ کے لیے ان شخصیات کے اکاؤنٹس ہیک کیے۔
بین الاقوامی ویب سائٹ کے مطابق ایک امریکی نوجوان نے اعتراف کیا ہے کہ اس نے ایک بڑے بٹ کوائن فراڈ کے لیے کئی مشہور شخصیات کے ٹویٹر اکاؤنٹس ہیک کیے۔
گراہم آئیوان کلارک 17 سال کے تھے جب انہوں نے اس فراڈ کی منصوبہ بندی کی جس میں کئی معروف شخصیات بشمول کم کاردیشن ویسٹ، کین ویسٹ، ایلن مسک، بل گیٹس اور بارک اوباما کے ٹویٹر اکاؤنٹس ہائی جیک کیے گئے۔
فلوریڈا کی عدالتی دستاویزات کے مطابق ملزم اب اقبال جرم کے معاہدے کے تحت 3 سال جیل میں گزارے گا۔
ملزم اپنی 3 سالہ سزا کے 229 دن پہلے ہی جیل میں گزار چکا ہے، وہ اب 18 سال کا ہوچکا ہے مگر اسے کمسن مجرم کے طور پر سزا دی گئی ہے۔
قانون نافذ کرنے والے اداروں کی اجازت اور نگرانی کے بغیر کلارک کمپیوٹرز استعمال نہیں کر سکیں گے۔
