لاہور : صوبائی دارلحکومت سے 18 سالہ نوجوان کو اغوا کرلیا گیا، اغواکاروں نے والد کو ویڈیو کال پر لاکھوں روپے تاوان طلب کیا ہے۔
تفصیلات کے مطابق لاہور کے تھانہ برکی کی حدود سے اٹھارہ سال کے حماد علی کو اغوا کرلیا گیا۔
مغوی کے اغوا کا مقدمہ نامعلوم ملزمان کیخلاف والد رزاق کی مدعیت میں تھانہ برکی میں درج کر لیا ہے۔
مقدمے میں کہا کہ حماد علی گھر کا سامان لینے باہر گیا تو اسے اغوا کر لیا گیا، جس کے بعد ملزمان نے حماد کے والد کو ویڈیو کال پر لڑکے کو دکھایا اور لاکھوں روپے تاوان مانگا۔
رزاق نے اغوا کار کے موبائل کی لوکیشن ٹریس کرکے اوکاڑہ گیا جہاں ملزم ہاتھ لگ گیا تاہم دیگرملزمان مغوی کو لے کر فرار ہوگئے۔
مدعی مقدمہ نے ملزم کو لاہور لا کر پولیس کے حوالے کر دیا، رازق کو ساتھی کی رہائی اور تاوان کیلئے دوبارہ دھمکی آمیز کالز موصول ہو رہی ہیں۔
پولیس اندراج مقدمہ اور ملزم تحویل میں ہونے کے باوجود ساتھی ملزمان کا سراغ نہیں لگا سکی۔
نوجوان کے والد نے وزیر اعلی پنجاب ، آئی جی پنجاب اور سی سی پی او لاہور سے لڑکے کو بازیاب کرانے کی اپیل کی ہے۔
